ශ්රී සුදර්ශන මහා විහාරය
තුඹගොඩ බළන්ගොඩ
"තුඹගොඩ පන්සල" යනුවෙන් අසල්වැසි දනන් තුඩග රැඳුන මේ මහා විහාරය සියවස් ගණනාවක් තිස්සේ බොදු බැතිමතුන් මහත් බැතිසිතින් වන්දනාවට යන ස්ථානයයි.
"වෙසක් එකට තුඹගොඩ පන්සල් යාම" තදාසන්න ජනතාවගේ අනිවාර්ය සිරිතකි. එම වන්දනා ගමන කුඩා දරුවන්ගේ සුන්දර සිහිනයකි. පිළිමගෙය තුළ දකින දසුන් තුළින් ඔවුන් මත්ව සිටිති.
පිවිසුමේ දීම බැබලෙන දඹදිව සාංචිතොරණ අනුරුව බොහෝ බොදු උවැසියන් හඳුනන්නේ "තුඹගොඩ පන්සලේ තොරණ" ලෙසිනි.
එම ආකර්ශනීය අනුරූ නිර්මාණය එතරම්ම සිත් වශිකරවන සුළුය.
සසුන් කෙත බබලන්නේ සුපේශල ශික්ෂාකාමී මහා සඟරුවන නිසාය. තුඹගොඩ මහා විහාරයට එවන් මහසඟරුවනේ අඩුපාඩුවක් කිසිදිනක නොදැනුනි.
සියවසකට ආසන්න කාලයක් සසුනඹර
ආලෝකමත් කළා වූද,
වසර 30 කට අධික කාලයක්
බළන්ගොඩ ආනන්දමෛත්රෙය
ජාතික පාසල් විදුපියස බැබලවූ සුධම්මවංස ගුරු දෙවයන් වහන්සේ සතුව තිබූ පාණ්ඩිත්යය අසමසම
විය. අප්රමාණ දයාවෙන් සිසුදරුවන් පෝෂණය කළ අසමසම ගුරුවරයකු වූ ස්වාමීන්ද්රයන්
වහන්සේ විදුපියසෙන් ජාතියට දායාද කළ බොහෝ
විද්වතුන්ගේ භක්ත්යාදරය දිනාගත් ගුරු
දේවයාණන් වහන්සේ වූහ.
අතිපූජ්ය අති ගෞරවනීය බළන්ගොඩ සුධම්මවංශ නම් වූ ගුරු දේවයාණන් වහන්සේ
අමරපුර සිරි සද්ධම්මවංස මහා නිකායේ මහානායක ධුරයෙන් පිදුම් ලැබ
බළන්ගොඩ තුඹගොඩ ශ්රී සුදර්ශන මහා විහාරාධිපති සිරි සුමනජෝති වංසාවතංස ජිනශාසන කීර්ති ශ්රී ප්රවචන විශාරද ත්රිපිටක වාගීශ්වර සිරි සද්ධම්මවංසපාල ගණාවරිය මහෝපාධ්යාය රාජකීය පණ්ඩිත ශාස්ත්රවේදී අතිපූජ්ය බළන්ගොඩ සිරිසුධම්මවංස මහා නායක මහා ස්වාමීන්ද්රයන් වහන්සේ ලෙසින්
බෞද්ධ ජනතාව අතර පූජනීයත්වයට පත්ව 2013 ජනවාරි 07 දක්වා වැඩ සිටියහ.
